रुकुम पश्चिम १, फागुन ।
रुकुम पश्चिमको सानीभेरी गाँउपालिकामा आयोजित पाँचौ राष्ट्रिय मौराखारा गुरिल्ला म्याराथनको पुरुष तर्फको उपाधि मुसिकोट नगरपालिका -७ साँखका धावक दुर्गा बुढाले जितेका छन् । पुरुष तर्फको निर्धारित ४६ किलोमीटरको दुरी ४ घण्टा ५८ मिनेटमा पार गर्दै बुढाले गुरिल्ला म्यारथनको उपाधि हात पार्नु भएको हो
। त्यस्तै भोजपुरका उमेश राईले ५ घण्टा ४ मिनेटमा उक्त दुरी पार गर्दै दोस्रो हुनुभएको छ । ५ घण्टा ११ मिनेटमा दुरी पार गर्दै सानीभेरी गाउँपालिका -३, का अर्जुन कुमार बस्नेत तेस्रो हुनुभएको छ । ५ घण्टा २१ मिनेटमा निर्धारित दुरी पार गर्दै रुकुम पुर्वका हिमाल बुढा चौथो हुनुभएको छ ।
पुरुष म्यारथन तर्फ प्रथम हुनेले १ लाख, दोस्रो हुनेले ७५ हजार, तेस्रो हुनेले ४५ हजार र चौथो हुनेले १५ हजार रुपैया पुरस्कार प्राप्त गरेका छन् । साथै दशौ स्थान सम्म आउने धावकहरुले ३ हजारका दरले पुरस्कार प्राप्त गरेको बताइएको छ ।
त्यस्तै महिला तर्फ निर्धारित ३४ किलोमिटर दुरी ३ घण्टा २४ मिनेटमा पार गर्दै जुम्लाकी मञ्जु रावतले महिला तर्फको उपाधि हात पार्न सफल हुनुभएको छ । खोटाङकी प्रिया राईले निर्धारित दुरीमा ३ घण्टा ३४ मिनेटमा पार गर्दै दोस्रो हुनुभएको हो । ३ घण्टा ४१ मिनेटमा निधारित दुरी पार गर्दै जुम्लाकि राज्यलक्ष्मी रावत तेस्रो हुनुभएको छ । ३ घण्टा ४२ मिनेटमा निर्धारित दुरी पार गर्दै सुर्खेतकी बिन्दु हमाल चौथो हुनुभएको छ ।
महिला म्याराथन तर्फ प्रथम हुनेले ६० हजार, दोस्रो हुनेले ४० हजार, तेस्रो हुनेले ३० हजार तथा चौथो हुनेले १० हजार पुरस्कार प्राप्त गरेका छन् । त्यस्तै १०औ स्थान सम्म आउनेलाई ३ हजारका दरले पुरस्कार प्रदान गरिएको छ ।
गुरिल्ला म्याराथनको पुरुष तर्फ ६१ जना धावक र महिला तर्फ २१ जना धावकको सहभागिता रहेको आयोजक सानीभेरी गाउँपालिकाले जानकारी दिएको छ ।
गाउँपालिकाले सशस्त्र जनयुद्धको बेला तत्कालिन माओवादी गुरिल्लाहरुले प्रयोग गरेको बाटोमा म्याराथन सञ्चालन गदै आएको छ । सानीभेरी गाउँपालिकाको प्रशासनिक केन्द्र सिम्ली देखि तत्कालिन माओवादीले सेना उत्पादन गरेको मौराखारा सम्मको बाटोमा गाउँपालिकाले हरेक बर्ष जनयुद्ध दिवसको अवसरमा गुरिल्ला म्याराथन सञ्चालन गर्दै आएको गाउँपालिका अध्यक्ष विष्टले जानकारी दिनुभयो ।
