रुकुम पश्चिम ११, माघ ।
रुकुम पश्चिमको मुसिकोट नगरपालिका -७, साँख गाउँमा वडा स्तरीय पुरुष भलिबल प्रतियोगिता आजबाट सुरु भएको छ । परम्परागत रुपमा लाग्दै आएको पापिनी मेलाको अवसरमा साबिक मध्यपश्चिमाञ्चल विकास क्षेत्र अन्तर्गतको वडा स्तरीय पुरुष भलिबल प्रतियोगिता सुरु भएको हो ।
आज देखि सुरु भएको पापिनी मेलाको भलिबल प्रतियोगिता जिल्ला समन्वय समिति प्रमुख लुम्बिनी गौतमले उद्घाटन गर्नुभएको छ । हाम्रो सरोकार रुकुमले आयोजना गरेको प्रतियोगितामा मुसिकोट नगरपालिका वडानम्बर -७, को प्रमुख सहकार्य रहेको छ ।
प्रतियोगिताको विजेताले नगद एकलाख ११ हजार पुरस्कार पाउने हाम्रो सरोकारका अध्यक्ष रिजन पाण्डेले जानकारी दिनुभयो । त्यस्तै उप विजेताले ७५ हजार र तृतीय हुनेले नगद ४१ हजारका साथै ट्रफि, मेडल र प्रमाण पत्र प्राप्त गर्नेछन् । सान्त्वना हुने टिमले नगद ३१ हजार, मेडल र प्रमाणपत्र पाउने बताइएको छ ।
त्यस्तै व्यक्तिगत इभेन्टमा पनि खेलाडीहरुलाई पुरस्कृत गरिने छ । उत्कृष्ट खेलाडी र प्रशिक्षकले तीन-तीन हजार तथा वेस्ट स्पाइकर, वेस्ट सेटर, वेस्ट डिफेन्डर, वेस्ट क्विकर र उदयमान खेलाडीलाई नगद दुई-दुई हजारले पुरस्कृत गरिने पाण्डेले बताउनुभयो ।
मेलामा भलिबल सहित घैँटो फोर, रसाकसी प्रतियोगिता आयोजना गरिनुका साथै स्थानीय मयुर नाच, सिँगारु नाच र पैंसेरु लगायतका नाचलाई पनि प्रतिस्पर्धा गराइने छ ।
प्रतियोगिता १७ गते सम्म सञ्चालन हुने बताइएको छ । परम्परागत रुपमा लाग्ने पापिनि मेला १५ गते सााँझ पापिनीको बिहे गरेपछि १६ गते मेला लाग्ने गर्दछ ।