जमुना गौतम
रुकुम पूर्व २५, भदौ ।
रुकुम पूर्वको सिस्ने गाउँपालिकाले २२ कृषकलाई आधुनिक मौरी घार वितरण गरेको छ । वडानम्बर -५, को दुदिल्लागैरा र आसपासका बस्तिमा मौरी पालन व्यवसाय सञ्चालन गर्दै आएका कृषकलाई घार वितरण गरिएको हो ।
आर्थिक वर्ष २०७८/०७९ को वार्षिक स्वीकृत कार्यक्रमबाट २२ कृषकलाई मौरिका घार वितरण गरिएको गाउँपालिकाका कृषि शाखा प्रमुख दिनेश ओलीले जानकारी दिनुभएको छ । उहाँका अनुसार २२ वटा आधुनिक घार सहित दुई महदानी पनि वितरण गरिएको छ ।
मौरीपालन व्यवसाय गर्दै आएका उद्यमीलाई व्यवसाय विस्तार र सक्रियताको आधारमा घार वितरण गरिएको छ । सक्रिय व्यवसायीलाई बढिमा ५ र अन्यलाई क्रमश ३, २, १ गरेर घार वितरण गरिएको ओलीले बताउनुभयो ।
गाउँपालिका अध्यक्ष कृष्ण रेग्मी, उपाध्यक्ष गोपाल रेउले र ५ नम्बर वडाअध्यक्ष विरेन्द्र बस्नेतले कृषकलाई मौरिका घार र महदानी वितरण गर्नुभएको हो । घार वितरण कार्यक्रममा बोल्दै अध्यक्ष रेग्मीले निर्वाहमुखि कृषिलाई सुधार गर्दै व्यवसायिकतातर्फ लाग्न कृषकलाई आग्रह गर्नुभएको छ ।
नागरिकको जीवनस्तर बदल्न कृषिमा व्यवसायिकता आवश्यक रहेको बताउँदै अध्यक्ष रेग्मीले मेहनतका साथ व्यवसायमा लाग्न पनि अनुरोध गर्नुभएको छ ।
त्यस्तै उपाध्यक्ष गोपाल रेउलेले कृषकलाई व्यवसायिक रुपमा मौरी पालनबाट आयआर्जन वृद्धि गरि जीवनस्तर उकास्न सहयोग पुगोस् भन्ने उद्देश्यले घार र अन्य सामग्री वितरण गरिएको बताउनुभयो ।
उन्नत घार र महदानी वितरण गरिएकोमा दुदिलागैरा र आसपासका बस्तीमा मौरि पालन गर्दै आएका कृषकहरु खुसी भएका छन् ।
