प्रेसपालिका संवाददाता : रुकुम पश्चिम सानीभेरी गाउँपालिका वडा नम्बर ६ घर भई हाल अमेरिकामा रहनुभएका मनराज देवकोटाले आफ्नो जन्मदिनको अबसरमा बिरामीलाई आर्थिक सहयोग गर्नुभएको छ ।
उहाँले वडा नम्बर ३ गरायला निबासी दुबै मृगौला फेल भई हाल काठमाडौमा उपचाररत सुमन नकाललाई ५० हजार र वडा नम्बर ११ निबासी मस्तिष्कको बिरामी बिरजित डाँगीलाई १० हजार गरी जम्मा ६० हजार रुपैयाँ सहयोग गर्नुभएको हो ।
उक्त रकम पत्रकार नारायण ओलीको समन्वयमा वडा नम्बर ३ का वडा अध्यक्ष बिर्ख बहादुर बिष्टद्वारा बिरामी सुमन नकालकी दिदी लालसरी नकाल ओलीलाई हस्तान्तरण गरिएको छ ।
सहयोगी देवकोटाले अमेरिकामा रहेर विगत देखि नै थुप्रै दुखी पिडितलाई सहयोग गर्दै आउनुभएको छ । हाल देवकोटाकै अगुवाईमा अमेरिकामा सुमन नकालको उपचारको लागि सहयोग अभियान संचालन गरिरहनुभएको छ । उक्त अभियानमा हालसम्म ५ लाख भन्दा बढी रकम जम्मा भैसकेको देवकोटाले बताउनुभयो ।
