रुकुम पश्चिम १६, भदौ ।
रुकुम पश्चिममा नेपाल कम्युनिष्ट पार्टी माओवादी केन्द्रको जनतासंग माओवादी विशेष रुपान्तरण अभियान सुरु भएको छ । जिल्लाका ६ वटा स्थानीय तहका ७३ वडामा एकैसाथ अभियान सुरु भएको हो।
नेकपा माओवादी केन्द्रका अध्यक्ष पुष्पकमल दाहाल प्रचण्डले देशभर एकै पटक अभियानको उद्घाटन गरेसंगै देशभर एकैसाथ आजदेखि अभियान सुरु भएको छ ।
अभियानले आजको युगको नेतृत्व तयार पार्ने विश्वास माओवादी केन्द्रले लिएको छ । साथै अभियानमा संगठन विस्तार, सदस्यता वितरण तथा नवीकरण, छलफल, बैठक, जनभेटघाट लगायतका गतिविधि संचालन हुने नेकपा माओवादी केन्द्र रुकुम पश्चिमले जनाएको छ ।
तीन महीना सम्म सन्चालन हुने अभियानबाट २५ लाख मतदातासंग प्रत्यक्ष संवाद गर्ने र ८ लाख सदस्य बनाउने मुख्य उदेश्य राखिएको छ ।
अभियानका लागि माओवादी केन्द्रले रुकुम पश्चिममा जाजरकोटका गगन खड्कालाई ईन्चार्जको रुपमा पठाएको छ ।
त्यस्तै पालिका इन्चार्जका रुपमा मुसिकोटमा जीवन बुढा, चौरजहारी नगरपालिकामा टीकाराम ओली, आठबीसकोट नगरपालिकामा लुम्बिनी गौतम, सानीभेरी गाउँपालिकामा मनबहादुर रावत, बाँफिकोट गाउँपालिकामा नेपबहादुर कँवर र त्रिवेणी गाउँपालिकामा रत्नबहादुर ओली खटिनुभएको छ ।
