रुकुम पश्चिम २४, चैत ।
रुकुम पश्चिमको त्रिवेणी गाउँपालिकाको खारानेटामा एकीकृत सेवा प्रवाहका लागि प्रशासकीय भवन निर्माणको कामले तीव्रता पाएको छ । स्थानीय तहको प्रशासकीय पूर्वाधार विकास कार्यक्रम अन्तर्गत संघ र स्थानीय सरकारको साझेदारीमा भवन निर्माणको कामले निरन्तरता पाएको हो ।
गाउँपालिकाका प्रमुख प्रशासकीय अधिकृत प्रेम बहादुर घर्तीका अनुसार ६ करोड बढि लागतमा बन्दै गरेको भवनको हालसम्म १८ प्रतिशत काम पूरा भएको छ । आगामी वर्ष २०८१ बैशाखमा सम्पन्न हुने गरि निर्माण कार्य चलिरहेको भवनका लागि संघीय सरकारको ६० र स्थानीय तहको ४० प्रतिशत लागत रहेको छ ।
तीन तलाको ३३ कोठे भवन निर्माणको काम पूरा भएपछि गाउँपालिकाको एकीकृत सेवा प्रवाहमा सहजता आउने बताईएको छ । स्थानीय सरकार निर्माण पछि त्रिवेणी गाउँपालिकाको आफ्नै प्रशासकीय भवन नहुँदा हालसम्म अस्थायी ट्रस्ट भवनबाट सेवाप्रवाहको काम चलिरहेको छ।
