रुकुम पश्चिम २८, बैशाख ।
रुकुम पश्चिममा आज दिउँसो ट्याक्टर दुर्घटना हुँदा दुई जनाको मृत्यु भएको । आठबिसकोट नगरपालिका -१४, छेपारे नजिकै ट्याक्टर दुर्घटना हुँदा दुई जनाको मृत्यु भएको हो । अन्य तीन जना घाइते भएको प्रहरीले बताएको छ ।
जिल्ला प्रहरी कार्यालयका प्रहरी निरीक्षक बिष्णु श्रेष्ठका अनुसार मृत्यु हुनेमा सोही वडाको पिपलचौरका ट्याक्टर चालक २२ वर्षीय विकास खड्का र १८ वर्षीय हरी आचार्य रहेका छन् । उनीहरू दुबै जनाको घटनास्थलमै मृत्यु भएको प्रहरीले बताएको छ । दुर्घटनाका घाइते तीन जनालाई उपचारका लागि चौरजहारी अस्पताल पठाइएको छ ।
घाइते हुनेमा आठबिसकोट नगरपालिका -१४, का २० वर्षीय चिन्ताराम शर्मा, सोही वडाका १८ वर्षीय विकास पोख्रेल र सानीभेरी गाउँपालिका -४, का १६ वर्षीय निसान बुढाथोकी रहेको प्रहरीको भनाइ छ ।
आठबिसकोटबाट रिम्ना जाजरकोट तर्फ जाँदै गरेको भे २ त १६६८ नम्बरको ट्याक्टर एकसय ५० मिटर तल भेरी नदीमा खसेको बताइएको छ ।
