रुकुम पश्चिम ९, चैत ।
रुकुम पश्चिममा बैंकिङ कसुर आरोपमा फरार एकजनालाई प्रहरीले पक्राउ गरेको छ । आठबिसकोट नगरपालिका -९, राडी बजारमा रहेको प्रभु बैंक लिमिटेड शाखाको एक करोड बढी रकम अपचलन गरेको आरोपमा एकजनालाई पक्राउ गरेको हो ।
प्रहरी नायब उपरीक्षक नमराज भट्टराईका अनुसार पक्राउ पर्नेमा सोही वडाका ३१ वर्षीय निरज विक्रम शाह रहेका छन् । आरोपी शाहलाई बिहिवार बिहान नेपालगन्ज उपमहानगरपालिका -१५, जमुनाहबाट पक्राउ गरिएको हो । प्रहरी निरीक्षक धर्मेन्द्र खड्काको कमाण्डमा खटिएको प्रहरी टोलीले बाँके प्रहरी संग समन्वय गरेर निज शाहालाई खोजतलासको क्रममा पक्राउ गरिएको बताइएको छ ।
पक्राउ परेका आरोपी शाहलाई सोही दिन सम्मानित उच्च अदालत बिरेन्द्रनगर सुर्खेतबाट ७ दिनको म्याद थप गरि रुकुम पश्चिमको प्रहरी हिरासतमा राखेर अनुसन्धान कार्य भैरहेको प्रहरीले जनाएको छ ।
आरोपी शाहले गएको माघ महीनामा आठबिसकोट नगरपालिकाको खाताबाट एक करोड ३१ लाख २५ हजार रकम अनाधिकृत रुपमा अपचलन गरेका थिए । उनले नगरपालिकाको चेकबाट माघ ७ गते २९ लाख रुपैयाँ र माघ १७ गते ७८ लाख ७५ हजार रुपैयाँ अपचलन गरेका थिए ।
त्यस्तै माघ १९ गते २३ लाख ५० हजार रकम अपचलन गरेका थिए । शाहले अपचलन गरेको रकम मिटर व्याजमा प्रयोग गरेको प्रारम्भिक अनुसन्धानबाट खुल्न आएको छ ।
सो रकम दुरुपयोग लगत्तै फरार रहेका शाहलाई करिब डेढ महीना पछि प्रहरीले पक्राउ गरेर शुक्रबार सार्वजनिक गरेको हो ।
पक्राउ परेका शाह राडी बजारमा रहेको प्रभु बैंकमा अप्रेशनल इन्चार्जको रुपमा कार्यरत थिए ।
