रुकुम पश्चिम १८, माघ ।
भारी हिमपातका कारण मध्यपहाडी लोकमार्ग अवरुद्ध हुँदा सडक खण्डको हिउँ हटाएर आजै अवरुद्ध सडकलाई पुनः खुलाइएको छ । मुसिकोट नगरपालिका -८, को रिनदह र आसपासको सडकमा जमेको हिउँलाई हटाएर बिहानै देखि अवरुद्ध बनेको सडक बेलुकी खुलाइएको हो ।
मुसिकोट नगरपालिकाको जेसीबी सहित नगर प्रहरी, नेपाल प्रहरी र जनप्रतिनिधिको टोलीले पाँच घण्टा लगाएर सडकमा जमेको हिउँ हटाएको नगरपालिकाका नगर प्रहरी सहायक निरीक्षक उमेश केसीले जानकारी दिनुभयो । बिहानै देखि भारी हिमपात हुँदा काठमाडौंबाट भित्रिने तथा रुकुम पश्चिमबाट बाहिरीने सवारी साधन हिउँमा फसेका थिए । जसका कारण गन्तव्यमा हिंडेका यात्रु समेत बाटोमै अलपत्र परेका थिए ।
तर समयमै सडक खण्डमा जमेको हिउँलाई हटाएर छोटो तथा लामो दूरीको यातायात सेवालाई बेलुकी देखि नै सञ्चालन गरिएको छ । वर्षा र हिमपातका कारण रुकुम पश्चिमको जनजीवन कष्टकर बनेको छ ।
त्यस्तै अस्थाई टहरामा बस्दै आएका भूकम्प प्रभावित क्षेत्रका वासिन्दा चिसोले थप प्रभावित बनेका छन् ।
