रुकुम पश्चिम २६, पुस ।
रुकुम पश्चिमको मुसिकोट देखि बाँफिकोट गाउँपालिका केन्द्र जोड्ने पक्की सडक निर्माणको कामले तीव्रता पाएको छ । मुसिकोट-नदुवा सडक खण्ड अन्तर्गत माछिमी देखि बाँफिकोट सम्मको सडक निर्माणको कामले तीव्रता पाएको हो ।
पूर्वाधार विकास कार्यालय चौरजहारीका सूचना अधिकारी विश्राम पुनले चालु वर्षको बैशाखमै कालोपत्रे गरिसक्नुपर्ने भएकाले द्रुत गतिमा निर्माण कार्य अगाडि बढेको बताउनुभयो । माछिमी देखि बाँफिकोट र चिसापानी देखि राडी सम्मको सडक खण्ड कालोपत्रेका लागि हाल सडक निर्माणको काम धमाधम चलिरहेको छ ।
कर्णाली प्रदेश सरकार अन्तर्गत पूर्वाधार विकास कार्यालयको ३३ करोड ४८ लाख बजेटमा कालोपत्रे गरिने सडकको हाल २५ प्रतिशत काम पूरा भएको छ ।
जसअन्तर्गत चिसापानी देखि राडीबजार सम्मको सात किलोमिटर सडक खण्डमा अहिले ग्राभेल गर्ने काम भैरहेको छ । तर माछिमी देखि बाँफिकोट खण्डको १० किलोमिटर सडकमा विस्तार र नालीको काम चलिरहेको बताइएको छ ।
