निराजन सिर्पाली
रुकुम पूर्व १५, कात्तिक ।
हिमाली जिल्ला रुकुम पूर्वमा चिसो वढेसंगै जिल्ला अस्पतालमा भर्ना भै उपचार गरि रहेका गर्भवति, सुत्केरी र नवजात शिशु तथा अन्य विरामिहरु प्रत्यक्ष समस्यामा परिरहेका छन् । हिउँदयाममा निकै चिसो हुने रुकुम पूर्वमा वर्षेनी हिउँ पर्दछ भने हाल चिसो मौसम सुरु भैसकेको छ ।
चिसो वढे संगै जिल्ला अस्पतालको समस्यालाई मध्यनजर गरि रुकुम पूर्वको स्वास्थ्य क्षेत्रमा काम गर्ने गैर सरकारी संस्था फेयरमेड फाउण्डेशन र सर्वाङ्गीण विकास केन्द्र (एचडिसि नेपाल) को ग्रामिण स्वास्थ्य सुधार परियोजना अन्तर्गत १५ थान ब्लाङकेट बुधवार एक कार्यक्रमका विच रुकुम पूर्व जिल्ला अस्पताललाई हस्तान्तरण गरिएको छ ।
रुकुम पूर्वका प्रमुख जिल्ला अधिकारी माधव प्रसाद शर्माको विशेष उपस्थिति र आतिथ्यता रहेको हस्तान्तरण कार्यक्रममा स्वास्थ्य कार्यालय रुकुम पूर्वका कार्यालय प्रमुख पुष्कल प्रसाद श्रेष्ठ, प्रमुख अनुसन्धान अधिकृत चिरञ्जिवि वुढा, रुकुम पूर्व अस्पतालका मेसु जितेन्द्र कोईराला, स्वास्थ्य कार्यालयका ल्याब निरीक्षक निम प्रसाद गिर, कोल चेन निरिक्षक मनोज श्रेष्ठ, फेयरमेड फाउण्डेशनका दान वहादुर कार्की, एचडिसि नेपालका निर्देशक लिलामणि गौतम लगायतको उपस्थिति रहेको थियो ।
हस्तान्तरण कार्यक्रममा बोल्दै प्रमुख जिल्ला अधिकारी माधव प्रसाद शर्माले जिल्ला अस्पताल जिल्लाकै एक मात्र सरकारी अस्पताल र रिफरल सेन्टर भएकोले यसलाई थप व्यवस्थित र प्रभावकारी रुपमा गुणस्तरीय सेवा प्रवाह गर्न सक्षम बनाउने कार्यमा सवैको हातेमालो हुनुपर्ने बताउनुभएको छ ।
साविकको रुकुमकोट स्वास्थ्य चौकीमा जिल्ला विभाजन पछि रुकुम पूर्व जिल्ला अस्पताल संञ्चालनमा छ । सिमित भौतिक संरचना र आवश्यक सामग्री तथा उपकरण अभावमा पनि आफ्नो टिम गुणस्तरीय सेवा प्रवाहमा लागेको र सरोकारवाला निकायहरुबाट सानो सहयोग प्राप्त हुँदा पनि तत्कालिन आवश्यकताहरु परिपूर्ति हुने भएकोले अस्पतालका मेसु डा. जितेन्द्रराज कोईरालाले आगामी दिनमा सहयोग र सहकार्यको लागि सहयोगी निकायलाई धन्यवाद सहित आग्रह गर्नुभएको छ ।
रुकुम पूर्व जिल्लामा ग्रामिण स्वास्थ्य सुधार परियोजना संञ्चालनमा आए पछि जिल्लाको स्वास्थ्य संस्था र स्वास्थ्यकर्मीहरुको क्षमता अभिवृद्धि संगै स्वास्थ्यका अन्य विभिन्न क्षेत्रहरुमा ठुलो सहयोग भएको स्वास्थ्य कार्यालयका कार्यालय प्रमुख पुष्कल प्रसाद श्रेष्ठले वताउनुभएको छ ।
