अमरराज पुन
रुकुम पश्चिम ११, असोज ।
कर्णाली प्रदेश सरकारका मुख्यमन्त्री राजकुमार शर्माले प्रदेशको बजेट कार्यान्वयनका लागि आन्तरिक छलफल थालिएको बताउनुभएको छ । नेपाल पत्रकार महासंघ रुकुम पश्चिमले बिहीवार मुसिकोटमा आयोजना गरेको पत्रकार भेटघाटमा बोल्दै चालू वर्षको बजेट परिचालन र कार्यान्वयनमा छलफल भैरहेको बताउनुभएको हो ।
सरकारले विनियोजन गरेको बजेट हाल संसदीय समितिमा छलफलको विषय बनेको र सोही अनुसार कर्णाली समृद्धिको तयारी गरिएको मुख्यमन्त्रीको भनाइ छ । उहाँले बजेट कार्यान्वयन सङ्गै केही कानुन र कार्यविधि निर्माणलाई पनि सरकारले अगाडि बढाएको बताउनुभएको छ ।
जसअन्तर्गत निजामती ऐन, आमसञ्चार, कर्णाली समृद्धि लगायत कार्यविधि निर्माण गर्न लागिएको मुख्यमन्त्रीले जानकारी दिनुभएको छ ।
त्यस्तै मुख्यमन्त्री शर्माले कर्णालीको मुख्य समस्या नै गरिबी भएकाले त्यसको अन्त्यका लागि कर्णालीका १० हजार युवालाई रोजगारी व्यवस्था गर्ने प्रक्रिया पनि अगाडि बढिरहेको बताउनुभएको छ । त्यसका लागि यससंग सम्बन्धित कानुन र कार्यविधिको पनि थालनी गरिएको उहाँको भनाइ छ ।
मुख्यमन्त्री शर्माले अर्को एक फरक प्रसङ्गमा अहिले कर्णाली सरकार संघीयता कार्यान्वयनको संघर्षमा रहेको बताउनुभएको छ । यसबाट एकल र साझा अधिकारको सृजना हुने भएकाले सरकार र सदनमा समेत बहस तथा छलफल चलाइएको उहाँको भनाइ छ ।
