रुकुम पश्चिम १०, भदौ ।
रुकुम पश्चिमको मुसिकोट नगरपालिकाका सबै सेवा बन्द भएका छन् । शनिबार नगर उपप्रमुख विमलकुमार पुनबाट नगर शिक्षा, युवा तथा खेलकुद शाखा प्रमुख नरेन्द्र ओलीमाथि हातपात भएको भनिएको घटनाको बिरोधमा कर्मचारीहरुले गेटमा तालाबन्दी गरि नगरका सबै सेवा बन्द भएका हुन् ।
कर्मचारीहरुले ८ बुँदे माग राखी नगर प्रमुख महेन्द्र केसीलाई पनि बुझाएका छन् । जसमा दोषिलाई कडाभन्दा कडा कारबाही र कर्मचारीहरुलाई भरपर्दो सुरक्षाको व्यवस्थाका साथै घटनाको छानविन गर्न उच्च स्तरीय न्यायिक समिति गठन गर्न माग गरिएको छ ।
त्यस्तै प्रमुख प्रशासकीय अधिकृतबाट कर्मचारीहरुको बैठक बसाल्नुपर्ने, कर्मचारीले कुनै गल्ति गरे कानुन वमोजिम कारबाही गर्नुपर्ने, जनप्रतिनिधि भएर आफैले कानुन बनाउने र कार्यान्वयनको समयमा कर्मचारीलाई दोषि देखाई आफू पन्छिने प्रवृत्ति रहेकोले आगामी दिनमा यसको अन्त्य हुनुपर्ने माग कर्मचारीहरुको छ ।
