सत्य बटाला
रुकुम पश्चिम ६, भदौ ।
रुकुम पश्चिमको आठविसकोट नगरपालिका -९, मा निर्माणाधीन अस्पतालको भवन भत्काईएको छ । नगर अस्पताल नजिकै रहेको अस्पतालको भवनमा गुणस्तरहीन काम भैरहेको पाइएपछि पालिकाबाट खटिएको अनुगमन टोलीले भवन भत्काएको हो ।
भवन निर्माणका लागि बनाइएको मापदण्ड ख्याल नगरी ठेकेदारले आफूखुसी गुणस्तरहीन भवन बनाएकाले अनुगमनका क्रममा भत्काईएको ईन्जिनियर राजेश गौतमले जानकारी दिनुभएको छ । उहाँका अनुसार भवनको भित्री भागको भुइँमा गरिएको ढलान, भवनको गाह्रो, बाहिरपट्टी गरिएको प्लास्टर भत्काइएको छ ।
गलवा क्याराभान जेभी कन्स्ट्रक्सन प्रालिले २०७८ सालमा १२ करोड १० लाखमा दुई वर्ष भित्र निर्माणको काम सक्ने भनि सम्झौता गरेको थियो । तर उक्त कम्पनीले प्राविधिक कारण देखाउँदै नगरपालिकाको कार्यपालिका बैठकले म्याद थप गरि २०८१ असार मसान्त सम्म भवन निर्माण गर्न निर्देशन दिएको थियो ।
उक्त कन्ट्रक्सनको काममा नगरपालिकाको प्राविधिक टोली अनुगमनमा जाँदा बालुवा, गिट्टी, सरिया, सिमेन्ट लगायतको अनुपात नपुगेको हुँदा निर्माणाधीन भवन भत्काईएको योजना शाखा प्रमुख रत्न परियारको भनाइ छ । अनुगमन टोलीले ठेकेदारलाई भत्काईएको संरचना गुणस्तरयुक्त तरिकाले पुनः निर्माण गर्न निर्देशन समेत गरेको छ ।
यहाँको नगरपालिकाले यसअघि पनि पालिकाका गुणस्तरहीन काम भएका धेरै संरचना भत्काउँदै आएको छ ।
