रुकुम पश्चिम ५, भदौ ।
प्रेस सेन्टर नेपाल बाँफिकोट गाउँपालिका समिति रुकुम पश्चिमका अध्यक्ष तथा संगठनका जिल्ला समन्वय समिति सदस्य एवं मध्यान्ह दैनिकमा कार्यरत पत्रकार प्रचण्ड खत्रीमाथि हातपात भएको छ । बाँफिकोट गाउँपालिका -४, छिनखेतका मेडिकल व्यवसायी लक्ष्मण शाहीले हातपात गरेका हुन् ।
समाचारमा शाहीले संचालन गरेको सिस्ने हिमाल मेडिकल हलको फोटो राखेको भन्दै पत्रकार खत्रीमाथि हातपात गरेका छन् ।
हातपातका साथै ज्यान मार्ने धम्की दिएको र आफूले प्रयोग गर्दै आएको मोबाइल खोसेर फालिदिएको पत्रकार खत्रीको भनाइ छ ।
यसैविच प्रेस सेन्टर नेपाल जिल्ला समन्वय समिति रुकुम पश्चिम र प्रेस सेन्टर नेपाल मुसिकोट नगर समितिले घटनामा संलग्न शाहीलाई कारबाहीको माग गरेको छ । खत्रीमाथि हातपात भएको र ज्यान मार्ने धम्की दिएको घटनाले संगठनको गम्भीर ध्यानाकर्षण भएको जनाउँदै दोषीलाई कानुन बमोजिम कारबाही गर्न माग गरेको हो ।
अनुगमनको समाचारमा आफ्नो मेडिकलको फोटो प्रयोग गरेको भन्दै शाहीले पत्रकार खत्रीमाथि हातपात गर्नुका साथै ज्यान मार्ने धम्की दिएको तथा मोबाइल खोसेर फालिदिएको घटना सिंगो प्रकारितामाथिको हमला हो भन्ने हाम्रो संगठनको ठहर छ, संगठनका अध्यक्ष देवकुमार ओलीले जारी गरेको प्रेस विज्ञप्तीमा उल्लेख छ ।
त्यस्तै समाचारमा चित्त नबुझे कानुनी उपचार खोज्ने बाटो हुँदाहुँदै पनि पत्रकारमाथिको हमला प्रेस स्वतन्त्रता माथिकै हमला हो, पत्रकार खत्रीप्रति गरिएको हातपातको घोर भ्रत्सना गर्दै दोषी उपर कडा कारबाहीका लागि प्रहरी, प्रशासन समक्ष जोडदार माग गर्दछौं, विज्ञप्तीमा भनिएको छ ।
