निराजन सिर्पाली
रुकुम पूर्व ५, भदौ ।
जिल्ला प्रहरी कार्यालय रुकुम पूर्वले एक युवाको कुटपिट गरि हत्या गरेको अभियोगमा पाँच जना युवालाई पक्राउ गरेको छ । भूमे गाउँपालिका वडानम्बर -५, का २८ वर्षीय अन्जान बुढा मगरलाई कुटपिट गरेर हत्या गरिएको अभियोगमा पाँच जना युवालाई पक्राउ गरिएको हो ।
गत भदौ १ गते बुढा मगरलाई कुटपिट गरेर गम्भीर घाईते बनाइएको थियो । मछेना स्थित गोठबाट घरतिर फर्कने क्रममा पाँच जना युवाको आक्रमणमा परेर घाईते भएका उनलाई उपचारको लागि रुकुम पूर्व अस्पतालमा ल्याईएको थियो ।
तर त्यहाँ उपचार सम्भव नभएपछि थप उपचारको लागि भदौ ३ गते कोहलपुर मेडिकल कलेज रिफर गरिएकोमा सोही दिन नै घाईते अन्जानको मृत्यु भएको हो।
कुटपिट गर्नेमा जिल्लाको भूमे गाउँपालिका वडानम्वर -५, का ३१ वर्षीय चन्द्र बहादुर बुढा, सोही गाउँका २८ वर्षीय भाग्य बुढा, २५ वर्षीय तारा बहादुर बुढा, २५ वर्षीय रस्त बहादुर बुढा र २५ वर्षीय हस्त बहादुर बुढा मगर रहेको जिल्ला प्रहरी कार्यालय रुकुम पूर्वका सूचना अधिकारी तथा प्रहरी निरीक्षक गणेश पाण्डे जानकारी दिनुभएको छ ।
प्रहरीले उक्त घटनामा संलग्न भएको आरोपमा पक्राउ परेका पाँच जनालाई ज्यान सम्बन्धी कसुर मुद्धामा पक्राउ गरेको जनाएको छ। सोमबार रुकुमकोट जिल्ला अदालतबाट पाँच दिनको म्याद थप गरेर घटनाको थप अनुसन्धान भइरहेको प्रहरीले जनाएको छ ।
