रुकुम पश्चिम ४, भदौ ।
रुकुम पश्चिमबाट नेपालगञ्जको लागि जाँदै गरेको फोर्स गाडी (हाईस) दुर्घटनामा दुई जनाको मृत्यु भएको छ । सल्यानको कपुरकोट गाउँपालिका -३, आगरखोला भन्ने ठाउँमा आज दिउँसो भएको दुर्घटनामा दुई जनाको मृत्यु भएको हो ।
सल्यान प्रहरीका अनुसार दुर्घटनामा परेर रुकुम पश्चिमको सानीभेरी गाउँपालिका -११, का ६० वर्षीय कमारो कामी र सल्यान दार्मा गाउँपालिका -२, का ३६ वर्षीय खुम बहादुर खत्री भन्ने ओम्पत खत्रीको उपचारको क्रममा मृत्यु भएको छ ।
दुर्घटनामा अन्य १४ जना घाईते भएको सल्यान प्रहरीले जानकारी दिएको छ । घाईते हुनेहरुमा सल्यानको दार्मा गाउँपालिका -२, का ६० वर्षीय खिर्म खत्री, सोही स्थानका ४१ वर्षीया रुपा केसी, रुकुम पश्चिमकी ४० वर्षीया बिमला देवी पुन, सलयानको दार्मा गाउँपालिका -२, का ५१ वर्षीय टिकाराम केसी, उहाँको छोरा १८ वर्षीय मानबहादुर खत्री र सोही गाउँका रमेश केसी रहेका छन् ।
त्यसैगरी रुकुम पश्चिमको त्रिवेणी गाउँपालिका -७, का ५० वर्षीया गौमती खड्का, सानीभेरी गाउँपालिका -११, का २६ वर्षीय पुस्कर रसाईली, चौरजहारी नगरपालिका वडानम्वर -१२, का ४६ वर्षीय पल बहादुर खड्का, चौरजहारी नगरपालिका -१४, का १८ वर्षीया माया मगर, सोही ठाउँकी १६ वर्षीया निर्मला राना, सल्यानको दार्मा गाउँपालिका ५ की १६ वर्षिया रमिता चन्द, सानीभेरी गाउँपालिका -११, का २० वर्षिय भुपाल बिक र दार्मा गाउँपालिका -१ का ३२ वर्षीय ईन्द्रबहादुर केसी घाइते भएका छन् ।
दुर्घटनाको खबर लगत्तै घटनास्थलमा पुगेको प्रहरी टोली र स्थानीयले सबै यात्रुको उद्धार गरेर उपचारको लागि कपुरकोट स्थित स्वास्थ्य कार्यालयमा पठाएका थिए । अहिले घाईतेहरु सबैलाई थप उपचारका लागि प्रादेशिक अस्पताल तुलसीपुर दाङ पठाईएको छ ।
लु २ ख ५७३१ नम्बरको हाईस सडकदेखि करिब दुई सय पचास मिटर तल खसेको बताईएको छ । गाडि चालक सल्यान जिल्ला दार्मा गाउँपालिका -१, का २३ वर्षीय एक्क बहादुर चन्द भने फरार रहेको बताईएको छ ।
