रुकुम पूर्व ३०, साउन ।
वर्षाका कारण सानोभेरी नदिकाे बहाव बढेर नदी वरिपरिको जमिन कटान गर्दा रुकुम पुर्वकाे सिस्ने गाउँपालिका वडानम्बर -३ र सिस्ने ७ नम्बर वडा जाेडने झाेलुङ्गे पुल उच्च जाेखिममा परेको छ । केही दिन यता परेको अविरल बर्षाकाे कारण सिस्ने ३ स्थित मुलपानीमा नदीले जमिन कटान गर्दा पुल जाेखिममा परेको हाे ।
नदीले जमिन कटान गर्दा सिस्ने ३ का स्थानीयहरुकाे घर सहित जग्गामा क्षति पुगेको छ । स्थानीयका अनुसार सिस्ने गाउँपालिका वडानम्बर -७ मा पर्ने नाथिगाड र सिस्ने ३ मा पर्ने जमिनमा तटबन्ध गर्ने कुरामा असहमति हुँदा अहिले उक्त समस्या उत्पन्न भएको बताइएको छ ।
सिस्ने ३ का स्थानीय डन्ड बहादुर खड्काका अनुसार गत वर्षको भन्दा याे वर्ष नदीले धेरै जमिन कटान गरेको भन्दै यसमा तत्काल सम्बन्धित निकायले ध्यान दिनुपर्ने बताउनुभएको छ ।
यस अघि प्रदेश सरकारकाे १८ लाख बजेटमा उक्त स्थानमा तटबन्ध निर्माण गरिएको भए पनि बाढीले भत्काइदिएकाे जिल्ला समन्वय समिति रुकुम पूर्वका सदस्य लालजित बुढाले बताउनुभएको छ । त्यस्तै उहाँले सम्बन्धित निकायले सो ठाउँमा तटबन्ध निर्माणका लागि इच्छा देखाए जस्तो गर्ने र पछि गएर पन्छिने काम भइरहेको गुनासो गर्नुभएको छ ।
