पेट दुखेपछि थप उपचारका लागि चौरजहारी रिफर
64x64
२०८० श्रावन २३ मंगलबार प्रेसपालिका संवाददाता
321 Views

निराजन सिर्पाली
रुकुम पूर्व २३, साउन ।
भूमे गाउँपालिका की एक महिलालाई एक्कासी पेट दुखेपछि रुकुम पूर्व अस्पतालमा सामान्य उपचारपछि चौरजहारी अस्पतालमा रिफर गरिएको छ । जिल्लाको भूमे गाउँपालिका वडानम्बर -१, लुकुमकी २९ बर्षकी सृजना पुनलाई सोमबार बेलुका एक्कासी पेट दुख्न थाल्यो, रात भरी त्यतिकै अवस्थामा रहेपछि मंगलबार बिहानैदेखि धामी झाक्री र स्थानीय औषधि पसलबाट उपचार गराउँदा समेत निको नभएपछि उनलाई मंगलबार दिउँसो १ बजे तिर रुकुम पूर्व अस्पतालमा बेहोस अवस्थामा पुर्याइयो ।

तत्काल भिडियो एक्सरे गर्दा सृजनाको पाठेघर भन्दा बाहिर गर्भ बसेको शंका लागे पछि उनलाई रिफर गरिएको हो । रुकुम पूर्व अस्पतालमा सामान्य उपचार पछि उहाँलाई चौरजहारी अस्पतालमा रिफर गरिएको स्वास्थ्य कार्यालय रुकुम पूर्वका ल्याव टेक्निसियन तथा सूचना अधिकारी निम प्रसाद गिरीले जानकारी दिनुभएको छ ।

उहाँका अनुसार यस अघि गर्भ बसेको कुरा थाहा नपाउँदा यस्तो समस्या आएको हो । उहाँको रुकुम पूर्व अस्पतालमा भिडियो एक्सरे गरेपछि पाठेघर भन्दा बाहिर गर्भ बसेको आशंकामा रुकुम पश्चिमको चौरजारी अस्पतालमा रिफर गरिएको बताइएको छ ।

पछिल्लो समय रुकुम पूर्वमा चेतना अभावका कारण ज्यान गुमाउने देखि धन सम्पत्ति खर्चका साथै दुःख पाउनेहरुको संख्या बढ्दो रहेको पाईन्छ । अहिले बिरामी पुनको अबस्था सामान्य रहेको बताइएको छ । यही साउन २० गते शनिबार सिस्ने गाउँपालिका वडानम्बर -१, भट्टेचौरकी सपना बुढाको सुत्केरीको क्रममा विकट भौगोलिक अवस्था तथा आफ्नै जिद्दीका कारण शिशु सहित आमाको मृत्यु भएको थियो ।

Subscribe
Notify of
guest
0 Comments
Inline Feedbacks
View all comments

Flash News