रुकुम पश्चिम ३, साउन ।
नेपाल पत्रकार महासंघ रुकुम पश्चिमले शाखामा आबद्ध साधारण सदस्यहरु तथा जिल्लामा क्रियाशिल पत्रकारको दुर्घटना बिमा गरेको छ । समाचार संकलनका क्रममा विभिन्न जोखिमहरु मोलेर फिल्डस्तरमा खटिने भएकाले जिल्लाका ५४ जना पत्रकारको दुर्घटना बिमा गरेको हो ।
मुसिकोट नगरपालिकाको आर्थिक सहयोगमा विभिन्न सञ्चार माध्याममा कार्यरत पत्रकारको दुर्घटना बिमा गरिएको महासंघका अध्यक्ष लक्ष्मण केसीले जानकारी दिनुभएको छ । शिखर इन्स्योरेन्स कम्पनी लिमिटेडमा ५४ जना पत्रकारको ५४ लाख बराबरको दुर्घटना बिमा गरिएको छ ।
यस कार्यले जोखिमपूर्ण अवस्थामा पत्रकारिता गरिरहेका पत्रकारलाई कामको लागि थप प्रोत्साहन हुने विश्वास लिईएको शाखा अध्यक्ष केसीले बताउनुभएको छ ।
नयाँलाई आकर्षण र क्रियाशिल पत्रकारलाई यस पेशामा टिकाउनको लागि शाखाले दुर्घटना बिमाको कार्यक्रम अघि सारेको उहाँको भनाइ छ । शाखाले नयाँ पत्रकार उत्पादन र क्रियाशिल पत्रकारको क्षमता विकासका लागि समेत विभिन्न कार्यक्रम सञ्चालन गरिरहेको छ ।
