रुकुम पश्चिम २९, असार ।
रुकुम पश्चिममा कृषि विकास कार्यालय र पशु सेवा कार्यालयले २ सहकारी सहित १३ जना उत्कृष्ट किसानलाई पुरस्कृत गरेका छन् । कृषि तथा पशु क्षेत्रमा उत्कृष्ट काम गर्ने किसानहरु छनौट गरेर पुरस्कार सहित सम्मान गरिएको हो ।
शुक्रबार मुसिकोटमा कृषि विकास कार्यालयले ८ जना र पशु अस्पताल तथा पशु सेवा कार्यालयले ७ जना उत्कृष्ट किसानहरु छनौट गरेर नगद सहित पुरस्कृत गरेको छ । पशु अस्पताल तथा पशु सेवा कार्यालयका निमित्त कार्यालय प्रमुख ज्ञानु कुमार शर्माका अनुसार पुरस्कृत तथा सम्मानित हुनेहरुमा बाख्रापालक किसानतर्फ आठविसकोट नगरपालिका -१२, का इकर्के पुन, भैंसीपालक किसानतर्फ मुसिकोट नगरपालिका -४, का राजु ओली र बंगुरपालनतर्फ मुसिकोट नगरपालिका -४, का लुमा खड्का बुढामगर रहेका छन् ।
त्यसैगरी घाँस विकास तर्फ मुसिकोट नगरपालिका -४, का पल बहादुर खड्का, माछापालन तर्फ आठविकासकोट नगरपालिका -७, का तिलक बुढा, विशिष्ट जातको कालिज पालनतर्फ चौरजहारी नगरपालिका -४, का धिरज भण्डारी र सहकारी तर्फ मुसिकोट नगरपालिका -४ स्थित सिद्धार्थ सहकारी संस्थालाई सम्मान गरिएको छ ।
पुरस्कृत तथा सम्मानित हुनेहरु मध्य सहकारीका रिमा खड्कालाई नगद बीस हजार पुरस्कार, प्रमाणपत्र र दोसल्ला सहित सममान गरएिको छ । अन्य ६ जनालाई भने नगद दश हजार पुरस्कार सहित प्रमाणपत्र र दोसल्लाले सम्मान गरिएको बताइएको छ ।
त्यसैगरी कृषि विकास कार्यालयले मुख्यमन्त्री उत्कृष्ट कृषक पुरस्कारका लागि छनौटमा परेका ८ जना किसानलाई पुरस्कृत तथा सम्मान गरेको छ । कृषि विकास कार्यालयका निमित्त कार्यालय प्रमुख मिन बहादुर केसीका अनुसार सम्मानित हुनेहरुमा मौरीपालक किसानतर्फ बाँफिकोट गाउँपालिका -४, का नरबहादुर चन्द, फलफूल खेती (कागती) तर्फ त्रिवेणी गाउँपालिका -२, का पुष्पलाल बोहरा, फलफूल (किवी) तर्फ बाँफिकोट गाउँपालिका -७, का चुके शाही र खाद्यान्नबाली बीउ तर्फ मुसिकोट नगरपालिका -७, का किसान याम कुमारी पाण्डे सम्मानित भएका छन् ।
त्यस्तै तरकारी बीउ तर्फ सानीभेरी गाउँपालिका -९, का टंक प्रकाश खड्का, च्याउ सिताके उत्पादन गर्ने किसान त्रिवेणी गाउँपालिका -५, बिमला ओली, तरकारी खेती तर्फ मुसिकोट नगरपालिका -३, का चक्रबहादुर बिष्ट र सहकारीतर्फ चौरजहारी नगरपालिका -१०, का किसान गोपा बिएम सम्मानित भएका छन् ।
सहकारी तर्फबाट सम्मानित हुने गोपा बिएमलाई नगद बीस हजार, सम्मानपत्र र दोसल्ला ओढाएर सम्मान गरिएको छ । अन्यलाई नगद दश हजार, प्रमाणपत्र र दोसल्ला ओढाएर सम्मान गरिएको निमित्त प्रमुख केसीको भनाइ छ ।
