निराजन सिर्पाली
रुकुम पूर्व २९, असार ।
जिल्ला प्रहरी कार्यालय रुकुम पूर्वले समुदाय प्रहरी साझेदारी अन्तरगत नागरिक सुनुवाई तथा अन्तरक्रिया कार्यक्रम शुक्रबार सम्पन्न गरेको छ । भूमे गाउँपालिकाको सभाहलमा आर्थिक वर्ष ०७९/८० मा भए गरेका काम तथा प्रहरी मातहतका इलाका प्रहरी, प्रहरी चौकी, प्रहरी पाेष्ट र वैकल्पिक प्रहरी पाेष्टकाे अवस्था र काम कार्वाहीकाे बारेमा जानकारी गराउँदै सुनुवाई कार्यक्रम सम्पन्न गरिएको हाे ।
नागरिक सुनुवाई तथा अन्तरक्रिया कार्यक्रममा जिल्ला प्रहरी कार्यालय रुकुम पूर्वका प्रहरी निरीक्षक गणेश पाण्डेले वार्षिक रुपमा भए गरेका काम कार्वाहीका विषयमा जानकारी गराउनुभएको छ । उहाँले चालु आर्थिक वर्षमा आम नागरिकलाई प्रदान गरिएको सेवा प्रवाह, भए गरेको प्रगति विवरण र प्राप्त गुनासोहरुको सुनुवाई गर्नुभएको हाे ।
साथै निरीक्षक पाण्डेले कुनैपनि समस्या तथा गुनासोहरु भए आफु लगायत हरेक प्रहरी युनिटहरुमा जानकारी दिन आग्रह गर्नुभएको छ ।
यसैगरी कार्यक्रममा बाेल्दै प्रमुख अतिथि तथा भूमे गाउँपालिका अध्यक्ष हाेम प्रकाश श्रेष्ठले प्रहरीले संधै देश र जनता प्रति बफादार रहेर काम गरेको तर समुदायमा प्रहरीलाई हेर्ने नजर अलि फरक हुने गरेकाेमा त्यस्तो व्यवहार परिवर्तन गर्न युवा तथा शिक्षितवर्ग लाग्नुपर्ने बताउनुभएको छ ।
प्रहरी निरीक्षक गणेश पाण्डेकाे अध्यक्षतामा सुरु भएको सो नागरिक सुनुवाई तथा अन्तरक्रियामा गाउँपालिका अध्यक्ष श्रेष्ठकाे प्रमुख आतिथ्यता रहेको थियो ।
