रुकुम पश्चिम २६, असार ।
भारतमा पहिरोले पुरिंदा एकै घरका तीन जना नेपालीको मृत्यु भएको छ । हिमाचल प्रदेश सिम्ला जिल्लाको क्यारामा गएको पहिरोमा पुरिएर रुकुम पश्चिमका तीन जनाको मृत्यु भएको हो ।
जिल्लाको त्रिवेणी गाउँपालिका–९, खहरेका ५० वर्षीय देबहादुर ओली, उहाँकी ४८ वर्षीया श्रीमती भिमा ओली र १६ वर्षीय कान्छो छोरा मोहन ओलीको सोमबार बिहान मृत्यु भएको हो ।
त्रिवेणी गाउँपालिका–९, का वडाध्यक्ष हरिबहादुर खड्काले पनि बिहान साढे १० बजेदेखि ११ बजेको बिचमा अविरल वर्षापछि झरेको पहिरोको कारण उनीहरूको मृत्यु भएको खबर पाएको बताउनुभएको छ ।
क्यारामा विगत तीन–चार दिनदेखि अविरल वर्षा भइरहेको र उनीहरू कोठाभित्रै रहेको बेलामा पहिरो खसेको वडाध्यक्ष खड्काको भनाइ छ । वडाध्यक्ष खड्काका अनुसार आमा भिमा र छोरा मोहन २२ दिनअघि मात्रै त्यहाँ पुगेका थिए ।
देवबहादुर भने गत मंसिरतिर सुरुमा उत्तर प्रदेशको पौरी गएका थिए । त्यहाँबाट उनी पछिल्लो समय सिम्ला पुगेका हुन् ।
भिमाका जेठा छोरा पनि उनीहरूसँगै बस्ने गरेका थिए । तर पहिरो आएको बेलामा बाहिर भएकाले उनी जोगिएका छन् ।
