रुकुम पश्चिम १८, माघ ।
रुकुम पश्चिमको बाफिकोट गाँउपालिका वडानम्बर -३, का मुटुरोगी कृष्णे कामीलाई अमेरिकामा रहेका नेपालीले आर्थिक सहयोग गरेका छन् । अमेरिकामा रहेका वडानम्बर -३, का स्यानी दहका चिन्ताराम ओली, धर्मराज ओली र अभिराज ओलीको नेतृत्वमा सहयोग रकम संकलन गरी सहयोग गरेको अभियानकर्ता अभिराज ओलीले बताए ।
मुटु रोगी कृष्णे कामीको काठमाडौको गंगालाल हस्पिटलमा उपचार भैरहेको छ । आर्थिक अवस्था कमजोर कामीको उपचार गर्ने पैसा नभएपछि अमेरिकामा बस्ने नेपालीले सहयोग रकम जुटाएर सहयोग गरेका हुन् ।
कामीको उपचारको लागि ३ लाख १२ हजार १ सय ८० रुपैया सहयोग भएको छ । अमेरिकामा बस्ने ४२ जना नेपालीहरुले उक्त रकम सहयोग गरेका हुन् । कामीको भएको सबै सम्पति उपचार खर्चमै सकिएको र उनको अहिले सम्पतिको नाममा १ वटा मात्र घर रहेको छ ।
एक कार्यक्रमका बीच वडा कार्यालयमा उक्त रकम कृष्णे कामीलाई हस्तान्तरण गरिएको छ । वडा अध्यक्ष तिलबिर केसीले उक्त रकम कामीलाई हस्तान्तरण गरेका हुन् । हस्तान्तरण कार्यक्रममा वडा अध्यक्ष केसी, वडा सदस्य देबराज उपाध्याय समाजसेबी लालबहादुर ओली लगायतको सहभागिता रहेको थियो ।
