रुकुम पश्चिम ३, कात्तिक ।
रुकुम पश्चिमको चौरजहारीमा तेस्रो बृहत चौरजहारी पर्यटन, व्यापार तथा साँस्कृतिक महोत्सव संचालन गरिने भएको छ । शुक्रबार पत्रकार सम्मेलन मार्फत कात्तिक १३ देखि २५ गते सम्म महोत्सव संचालन गर्न लागिएको आयोजकले जानकारी दिएको छ ।
महोत्सव मूल आयोजक समितिका संयोजक एल बि कटुवालका अनुसार चौरजहारीको कृषि, पर्यटन तथा कला-संस्कृतिको प्रचारप्रसार गर्ने उदेश्यले महोत्सव आयोजना गर्न लागिएको छ । महोत्सवमा राष्ट्रिय स्तरका ख्यातिप्राप्त कलाकार, इन्द्रेणी समूह र स्थानीय कलाकारको प्रस्तुति रहने बताइएको छ ।
त्यस्तै पालिकाका १४ वटै वडाका साँस्कृतिक झाँकी सहितका प्रस्तुति समेत महोत्सव अवधिभर प्रस्तुत गरिने भएको छ ।
महोत्सवमा झन्डै १ सय २० वटा स्टल रहने आयोजकले जनाएको छ ।
महोत्सव समापन पछि भने आयोजकले चौरजहारीमा खानेपानी र शौचालय निर्माण गरिने बताएको छ । महोत्सवको आयोजना सहिद स्मृति कला साँस्कृतिक केन्द्र चौरजहारीले गर्ने भएको छ ।
